2019

Thun wott jetz e Baldachin wie die grossi Schwöschter Bärn. 

Das wär en ächti Attraktion für d Lüt vo nah u färn. 

Das isch nid öppe ne Bieridee. Nei, es Projekt, wo ne Chance söu ha. 

Die wei haut gärn es Gwächshuus, dass Thun no schnäuer wachse cha.

 

Z Basel, dört am Rhy,
Sin d Maischtertraim verby. 
Si hän gmaint, es wärd jetz toller,
S wird nur schlimmer, si hän dr Koller.
FC Basu, gäge Thun luegsch eifach i! 
FC Basu, gäge Thun luegsch eifach i!

(wisch, wisch, wisch) Was söu das jetz? (wisch) Das muess ufhöre! 

(wisch, wisch, wisch) Das regt mi uf. (wisch) Das tuet mi schtöre. 

Im Auto ungerwägs in Thun, isch Schiissdräck, das schiisst a. 

Keis Wunger, hets i dere Schtadt en Invasion vo Flöige gha.

Hopp-stopp, hopp-stopp, na mau hopp-stopp, uf e Rhythmus chunnts da a. 

Hopp-stopp, hopp-stopp, so langsam überchunnsch chly Freud da dra. 

Thun het e geili Attraktion, zwar het me se müesse druflüpfe. 

Vo wyt här chöme d Lüt uf Thun as zäntume beliebtischte Schtouhüpfe.

 

 

Ä Maa i gälbe Hose möcht als Stapi réüssiere 

Är tuet sech fescht für d Jugend u für d Chinder engagiere 

Doch leider hets ihm nid ganz glängt, vergäbe alles quäle 

Wüll Thunerli ja gar no nid chöi wähle

 

Vegetarisch, glutefrei, ke Schwinigs, ke Laktose 

Fettarm, vitaminrich u ganz sicher nüt us Dose 

Saisonal, abwächsligsrich u low carb u vegan 

E ganz normale Kita-Ässensplan

 

 

Chunnt mi Suhn, der Fuessballfan, letschthin bi mir verbi 

Är müessi es nöis Libli ha, Manchester müess es si 

Bueb, di Mode isch nid nöi, hani du zue n ihm gseit 

Nur hei mirs dazumal als Hose treit

 

 

Di nächschti Staffle Game of Thrones di chunnt itz de scho gli 

Mir si o als Schwizervölkli das mal voll derbi

 

Dr Murer ufem Isethron laat gäg aus Böse rite

3 Drache het er scho a sire Site

 

Ä Rabiner und ä Prieschter het me 

fudiblutt vrwütscht im «Strämu»

Dr Rabi vrdeckt sofort sis Gsicht

hingäge dr Prieschter ämu si Trämu

 

«Wiso machsch du de so?», fragt dr Prieschter, du bisch ja nid ganz dicht
«Weisch, i mire Chirchgmein», meint dr Rabi, «erkennt me mi am Gsicht!»

 

D Fans vom FC Thun chöi im Fall zoubere, ohni z lüge
si bringes häre, dass am Bahnhof 

uf ds mal Velo ume flüge

D Fans vom FC Thun chöi gar nid zoubere, mir gsehs i 

zouberet het natürlech GC, 

die... sis natürlech gsi!

 

 

Madame de Meuron isch neu in Thun 

i Euem Gmeindrat, da däm trümmlige 

hoffentlech ghört de die Euch besser als Madame de Meuron vo Rümmlige.

 

Thun isch lingger, grüener, röter 

dasch üs z Bärn ou widerfahre 

üse Gmeindrat darf – und eue ou 

jetz de nur no Velo fahre!

 

 

Bim schili-Gimmel ha i chli Bammel 

öb me ihn cha fahre la 

a sim Velo müesst me no lengeri Zit 

d Stützrad dranne la

 

U vo Hädeners Könu, vo däm ghört me ja nüüt 

i gloub, däm fähltis chli am Schnuuf 

dr Eifachheit halber binge mir dä 

am Stapi hinger druuf

 

 

Und ou dr Sigi ghört uf ds Velo 

üsi Überlegig isch drum gsi 

bis dä mit em Velo im Stadion isch 

isch dr Match u d Schlegerei vrbi

 

 

D Thuner Stadtrats-Ample lüüchte küehn nume no gliich lang rot wi grüen

S hett chli meh Blassgrüen-Schimmer drin, gälb wirds no hennechurz zwüschinn 

Dr mittler Sitz ir Füfer-Horde wär um nes Haar ganz farbfrei worde

 

verblasst bi BD-FDP d Brillanz, verbesseret sech d SVP-Bi-Lanz 

Und dass d BDP muess darbe, isch logisch: z Thun mit YB-Farbe!

 

Rekord bi Nez Rouge Switzerländ, 

aber: minus 10 Prozänt im Bärner Oberländ 

I gloub, i weiss, wi das isch gloffe, 

d Bärner hei halt weniger Beizen offe 

Eis Prozänt chunnt ganz beschtimmt, wüll dr Lanz beschwingt gäng ds Velo nimmt 

ds Velo rot u rot dr Helm 

Wär da rot gseht, isch e Schelm.

 

 

Es fahrt e Zug vo Bärn nach Thun u hudlet wi ne Moore 

D Zwöisimmner hudlet s hinger inn, 

die nach Brig erhudlet s vore 

Je nu, mir müesse dankbar sii u gliich chli Fröid ha dranne: 

Solang er hudlet, fahrt er no – bis zur nächschte Panne 

Di nöie Doppuschtöcker, o herrjeh, chömen ou vom Bombardier.

 

 

 

Z Thun hinderem Bahhof schteit e Böss parat 

Muesch usgrächnet dä näh, de chunnsch öppe z schpat 

Wie nes Tanzfigürli träjhsch es Äxtratüürli 

rennsch dür d Rampe n uuf – dert fahrt er grad

Heilandtonnerwätter, bi däm Hudelwätter, schtatt deheime z plätt’re, sone Seeleschmätter

Und bir Haltschtell Poschtbrügg chunnt er gar nid verbii – hihihi-hihihi 

und wär blöderwiis i ds Bälliz muess, ja dä geit sowiso gschider z Fuess 

Und söttisch einisch öppis Schwärs zum Schleipfe ha, muesch i n es Lädeli im Heimbärg gah